आत्तापर्यंत झालेले सर्वेक्षण पाहता भाजपाचे मनोबल उंचावले
आगामी पिंपरी-चिंचवड महापालिका निवडणुकीत भाजपाने सत्तेची धुरा हाती घेण्यासाठी बिगुल फुंकला आहे. ही निवडणूक महायुती म्हणून लढवायची की स्वबळावर, हे अद्याप स्पष्ट झालेले नाही. मात्र भाजपाचा कल स्वबळावर निवडणूक लढविण्याकडेच दिसत आहे. यामागचे मुख्य कारण म्हणजे भाजपाने शहरभर केलेल्या विविध सर्वेक्षणांचे निष्कर्ष, ज्यामध्ये भाजपाला येणाऱ्या निवडणुकीत ७२ जागांवर आघाडी मिळताना दिसत आहे. त्यामुळेच भाजपाने महायुतीऐवजी महापालिकेतील सर्व चार सदस्यीय ३२ प्रभागांतून १२८ उमेदवार उभे करण्याची तयारी पूर्ण केली आहे.
पिंपरी चिंचवड महापालिका निवडणुकीसंदर्भात भाजपाने आतापर्यंत वेगवेगळी तीन सर्वेक्षणे केली आहेत. सर्वच सर्वेक्षणांमध्ये भाजपाला स्पष्ट बहुमत मिळेल असे भाकीत करण्यात आले आहे. आकडेवारीनुसार या सर्वेक्षणांच्या अहवालात भाजपाला ७२ पेक्षा जास्त जागांवर विजय मिळेल असा दावा केला आहे. तरीसुद्धा पक्षाला याहून अधिक जागांची अपेक्षा आहे. त्यामुळे अतिरिक्त जागांवर विजय सुनिश्चित करण्यासाठी भाजपाकडून धोरण आखले जात आहे. भाजपाच्या स्थानिक नेत्यांना खात्री आहे की या निवडणुकीत पक्षाला बहुमत मिळणे निश्चित असून, स्वतःच्या बळावर सत्तेत येणार आहे.
सत्ता परिवर्तनाचा प्रश्नच नाही
यासंदर्भात भाजपाचे पिंपरी चिंचवड शहराध्यक्ष शत्रुघ्न काटे यांनी सांगितले की, भाजपाला या वेळीही स्पष्ट बहुमत मिळणार असून सत्ता परिवर्तनाचा प्रश्नच उद्भवत नाही. आम्ही ३२ प्रभागांतून १२८ उमेदवार उभे करण्याची तयारी पूर्ण केली आहे. निवडणुकीच्या पार्श्वभूमीवर आमचा भर संघटनात्मक तयारीवर अधिक आहे. या निवडणुकीसाठी आम्ही बूथ पातळीवर तयारी केली आहे आणि प्रत्येक बूथवर किमान दहा कार्यकर्ते नेमले आहेत. २०१७ च्या महापालिका निवडणुकीत भाजपाने ७७ जागा जिंकून एकहाती सत्ता मिळवली होती. यावेळीही आम्ही संघटनात्मक बळावर प्रत्येक प्रभागातील मतदारांशी थेट संपर्क साधत आहोत.
संघटनात्मक कार्यांना प्राधान्य
काटे यांनी सांगितले की, प्रत्येक प्रभागात ५ ते ७ इच्छुक उमेदवार आहेत. मात्र तिकीट त्याच कार्यकर्त्याला दिले जाईल ज्याने संघटनात्मक काम केले आहे आणि मतदारांशी थेट संपर्क ठेवला आहे. सेवा पंधरवडा उपक्रमांतर्गत भाजपाचे कार्यकर्ते नागरिकांशी संवाद साधत आहेत, त्यांच्या समस्या जाणून घेत आहेत आणि आरोग्य, शिक्षण व वैद्यकीय सुविधा सुधारण्याचा प्रयत्न करत आहेत. विरोधी पक्षातील काही नेते भाजपात प्रवेश करण्यास इच्छुक आहेत. यावर त्यांनी सांगितले की, निवडणुका दिवाळीनंतर होतील. पक्षात कोणाचाही प्रवेश वरिष्ठ नेत्यांच्या मार्गदर्शनाखालीच होईल. स्थानिक पदाधिकाऱ्यांना विश्वासात घेतल्यानंतरच नवीन सदस्यांना प्रवेश दिला जाईल.
